| მარიამ მათიაშვილი|
Naomi: In Fashion გამოფენა ნაომი კემპბელის თითქმის 40-წლიან კარიერას მიუყვება. მოდის ინდუსტრიის ერთ-ერთი ყველაზე გავლენიანი ფიგურის შესახებ გამოფენას Victoria & Albert Museum უმასპინძლებს. სანამ ექსპოზიციის დეტალებს განვიხილავთ, გავიხსენოთ ნაომის სამოდელო კარიერის დასაწყისი. ყველაფერი იმით დაიწყო, რომ მოდელი 15 წლის ასაკში სამოდელო სააგენტოებმა აღმოაჩინეს. მოდელის დებიუტი 16 წლის ასაკში პარიზში, აზედინ ალაიას ჩვენებაზე შედგა. ორი წლის შემდეგ კი პირველი შავკანიანი მოდელი გახდა, რომელიც ფრანგული Vogue-ის გარეკანისთვის გადაიღეს. დღესაც, 53 წლის ასაკში, სუპერმოდელი კვლავ ახერხებს პოდიუმზე ბრწყინვას და Coperni-ს, Alexander McQueen-ის Dolce & Gabbana-ს უახლეს ჩვენებებში იღებს მონაწილეობას.
ნაომი მნიშვნელოვანი ფიგურა გახდა მოდის სამყაროში არა მხოლოდ სამოდელო კარიერით, არამედ მისი როლით სამოქალაქო აქტივიზმში. როგორც შავკანიანი სუპერმოდელი, იგი წლების განმავლობაში იბრძოდა მოდის ინდუსტრიის ინკლუზიურობისა და მრავალფეროვნებისთვის. ფერადკანიანი ქალების უფლებებისთვის ბრძოლა მის მთელ ცხოვრებას გასდევს და გამოფენაც ნათლად ასახავს ამას, განსაკუთრებით კი მის ახლო ურთიერთობას ნელსონ მანდელასთან. მიუხედავად იმისა, რომ ნაომის მცდელობამ გარკვეული შედეგი გამოიღო, 53 წლის სუპერმოდელი თვლის, რომ ბოლო წლებში მოდის ინდუსტრია უკან იხევს ფერადკანიანების ინკლუზიურობის საკითხში.
გადავიდეთ თავად გამოფენაზე, რომელიც ლონდონში V&A მუზეუმში 22 ივნისს გაიხსნება და 2025 წლის 6 აპრილამდე იქნება ვიზიტორებისთვის ღია. გამოფენის კურატორმა სონეტ სტენფილმა აღნიშნა, რომ ნაომი თავადაა ჩართულია ექსპოზიციის მოწყობის პროცესში.
“მისი ისტორიის მოყოლა ჩვენზე არ არის, გვინდა, რომ თავად მოჰყვეს საკუთარი ამბავი და მისი ხმა ჩაესმოდეთ გამოფენის სტუმრებს”.
საგამოფენო ნივთების 50%-ი მოდელის პირადი კოლექციიდან არის. ბევრია ისეთი უცნობი ნივთი, რომლებსაც ხალხი პირველად სწორედ V&A მუზეუმში ნახავს. აგრეთვე წარმოდგენილი იქნება მოდის ენთუზიასტებისთვის საკმაოდ ცნობილი ნივთებიც, როგორიცაა ვივიენ ვესტვუდის ფეხსაცმელი 30,5 სანტიმეტრიანი ქუსლით, რომლითაც ნაომი პოდიუმზე წაიქცა. სუპერმოდელის სურვილით გამოფენაზე პატივი მიეგება ყველა იმ დიზაინერსა თუ სტილისტს, რომლებთანაც წლების მანძილზე იმუშავა, მათ შორის აზედინ ალაიას და ჯანი ვერსაჩეს.
ექსპოზიცია სტუმრებს ნაომი კემპბელის ფენომენალური კარიერის სხვადასხვა მომენტში ამოგზაურებს და გაახსენებს მის გამოსვლებს ვალენტინოს, შანელის, ივ სენ ლორანისა თუ სხვა მოდის სახლების ჩვენებებზე. მის ცნობილ სამოსთან და ფეხსაცმელებთან ერთად სხვადასხვა ჟურნალის გარეკანის თუ ჩვენებების ფოტოები იქნება გამოფენილი. გამოფენის კურატორების მიზანია, ხალხს აჩვენონ არა მხოლოდ მოდელის საოცარი ლუქები და გამოსვლები, არამედ მისი, როგორც სუპერმოდელის, აქტივისტისა და ფილანტროპის შეუფასებელი გავლენა კულტურასა და საზოგადოებაზე.
სოციალური, პოლიტიკური და გარემოსდაცვითი გამოწვევებით სავსე მსოფლიოში, მხატვრები და მოდის დიზაინერები უფრო და უფრო ხშირად მიმართავენ თავიანთ ხელობას, როგორც სოციალური პროტესტისა და აქტივიზმის საშუალებას. ყოველდღიური ჩაცმულობა ბევრმა ადამიანმა ხელოვნებად აქცია, თვითგამოხატვის მთავარ საშუალებად.
საქართველოში, ისევე როგორც მსოფლიოში, IT სფეროსადმი ინტერესი დღითი-დღე იზრდება. ერთად, გავეცნოთ ამ სფეროსთან დაკავშირებულ ძირითად ინფორმაციას და ვნახოთ ის პოზიციები, რომლებიც დასაქმების მხრივ ყველაზე მოთხოვნადი და მაღალ ანაზღაურებადია.
ვენეციის ბიენალე 60-ე გამოშვებით ბრუნდება. ფესტივალის ბრაზილიელმა კურატორმა, ადრიანო პედროსამ ფესტივალის თემატიკად “Foreigners Everywhere” დაასახელა და აღნიშნა, რომ ბიენალეს წლევანდელი გამოშვება ხალხის ყურადღებას განსაკუთრებით ისტორიულად მარგინიზებული ერების არტისტებისკენ მიაპყრობს.
