10 მაისს, ნიუ-იორკის მეტროპოლიტენის ხელოვნების მუზეუმში კოსტიუმების ინსტიტუტის ახალი გამოფენა გაიხსნება. ექსპოზიცია სახელად Superfine: Tailoring Black Style შავკანიანი მამაკაცების სტილის ისტორიასა და დენდის კულტურას მიეძღვნა. MET Gala-ს სტუმრებს შანსი ჰქონდათ გამოფენა პირველებს დაეთვალიერებინათ, მათი დახმარებით კი მუზეუმის მხარდასაჭერად რეკორდული თანხა, 31 მილიონი დოლარი, შეგროვდა.
გამოფენის კონცეფცია ეფუძნება მონიკა მილერის წიგნს Slaves to Fashion: Black Dandyism and the Styling of Black Diasporic Identity. როგორც მუზეუმის დირექტორი ენდრიუ ბოლტონი აღნიშნავს, ეს წიგნი მან ანდრე ლეონ ტელის გარდაცვალების შემდეგ აღმოაჩინა და სწორედ აქედან დაიწყო გამოფენის იდეაზე ფიქრი.
წიგნის ავტორი და გამოფენის კურატორი მონიკა მილერი სრულიად სხვა პერსპექტივით გვაჩვენებს შავკანიანი მამაკაცის სტილს, რომელიც სცილდება იდენტობის ყველა საზღვარს - იქნება ეს რასა, სქესი თუ სექსუალობა. გამოფენაში მოდა თავისუფლებისა და თვითგამოხატვის მედიუმადაა წარმოდგენილი. მონიკას თქმით, დენდიზმი შავკანიანთა ოცნების რეალობად ქცევას განასახიარებს და თავისთავად არის უარის თქმა სტანდარტულ, თავსმოხვეულ იდენტობებზე.
გამოფენა სულ 12 თემატურ განყოფილებად არის დაყოფილი - თითოეული მათგანი შავკანიანების სტილის განსხვავებულ ასპექტს ეხმიანება და გამორჩეული სამოსისა თუ ნივთების ექსპოზიციას გვთავაზობს.
პრესისთვის განკუთვნილ ღონისძიებაზე ემოციური გამოსვლა ჰქონდა მსახიობსა და წლევანდელი მეთ გალას ერთ-ერთ მასპინძელს, კოლმან დომინგოს. მან ისაუბრა საკუთარი სტილის ყველაზე შთამაგონებელ ადამიანებზე - მამაზე, ძმასა და მამინაცვალზე. როგორც კოლმანი ჰყვება, მსახიობის მამინაცვალი მთელი კვირის განმავლობაში მძიმე ფიზიკურ შრომას ეწეოდა, ამიტომაც მას ხშირადზოგ ადგილებში გარღვეული და გაკერილი სამოსი ეცვა. მაგრამ მისი ნამდვილი სტილი ცოცხლდებოდა პარასკეობით, როცა ხელფასით და ლუდის შეკვრით ბრუნდებოდა სახლში. კოლმანის მამინაცვალი ამ დროს იცვამდა კოსტიუმს, Florsheim-ის ბრენდის ლამაზ ფეხსაცმელს, გრძელ შავ პალტოს, ნეკა თითზე კი საფირონის თვლიან ბეჭედს ირგებდა.
დომინგომ გაიხსენა მამაც, რომელიც ყოველთვის თვალისმომჭრელი ჩაცმულობით გამოირჩეოდა და თავისი ყვითელი კადილაკით მუდამ ყურადღების ცენტრში ექცეოდა. „აქ ვდგავარ და წარმოვადგენ იმ მამაკაცების ათობით თაობას, რომლებმაც პიროვნული თავისუფლების მოპოვება სტილისა და მოდის მეშვეობით შეძლეს,“ - თქვა დომინგომ.
კომლმანმა გამოსვლა ამერიკელი რეჟისორისა და დრამატურგის, ჯორჯ ვულფის სიტყვებით დაასრულა: „ღმერთმა შავკანიანი ხალხი შექმნა და შავკანიანებმა შექმნეს სტილი“.
დღეს, ჩვენი რედაქცია შემოდგომის ლუქების შთაგონებას გთავაზობთ. ტემპერატურის დაცემასთან ერთად, დროა, გარდამავალი სეზონის ლუქებზე ფიქრიც დავიწყოთ. სეზონის სტილის განუყოფელი ნაწილი კი კაბისა და ჩექმების მარტივი და ელეგანტური კომბინაციაა.
მოდის ისტორიაში არმანის სახელი განსაკუთრებულ ადგილს იკავებს. ის იმ დიზაინერთა შორისაა, რომლებმაც ეპოქის მიმართულება შეცვალეს. ჯორჯო არმანიმ მამაკაცის კოსტუმს ახალი სახე მისცა, ქალთა მოდაში კი თავდაჯერებული და ელეგანტური სტილი დაამკვიდრა. არმანის სახელი სამუდამოდ უკვდავყოფილია როგორც მოდის, ისე კულტურის ისტორიაში.
ანა ვინტურმა ამერიკული Vogue-ის სარედაქციო კონტენტის ახალი ხელმძღვანელი წარადგინა. ვინტური მოდის ყველაზე გავლენიან ჟურნალს არ ტოვებს, თუმცა ამერიკული გამოცემის საქმიანობას ამიერიდან 39 წლის ქლოე მალი გაუძღვება.
