ნიუ-იორკის ლეგენდარულ Pierre Hotel-ის კედლებში საზოგადოებამ კიდევ ერთი დაუვიწყარი საღამო იხილა. შემოქმედი კი დიზაინერი, კრისტიან სირიანო იყო, რომელმაც 2025 წლის გაზაფხულის სეზონის კოლექცია წარადგინა. შოუს დაწყებისთანავე, სასტუმროს ტერიტორია ფანტასტიკური სიუჟეტებიდან გადმოსული პერსონაჟებით გაივსო. კოლექცია, როგორც სირიანო ამბობს, ძმები გრიმების შავ-ბნელი ზღაპრების სამყაროში გვამოგზაურებს.
Pierre Hotel-ი ტირიფის ხეებით, ხავსით, ცოტა კვამლითა და ბინდისფერი განათებით ჯადოსნურ ტყეს დაემსგავსა. შავ და თეთრ ფერებში გამოწყობილი მოდელები სამოსს სცენის შუაგულში მდგარი ტირიფის ხისა და ყვავილებით გაფორმებული პოდიუმის ფონზე წარადგენდნენ. მათ შორის ერთ-ერთი კი, ქართველი მოდელი, თათია ახალაიაც გახლდათ. ჩვენებას წინა რიგებიდან ტიფანი ჰედიში, ლილ კიმი და სინდი ლაუპერი ადევნებდნენ თვალს.
ამ სეზონის სამოსი დიზაინერის გრძნობებს გამოხატავს. "მთელს ამ სიბნელეს ვგრძნობდი, თუმცა საღამოობით გლამურის ხასიათზე ვიყავი-ხოლმე"- ამბობს კრისტიანი. და მართლაც, ეს კოლექცია შავ-ბნელი სამყაროს რომანტიკულ და გლამურულ სახეზეა, რომელიც ადამიანის ორ მხარეს, ბედნიერსა და უბედურს, ბოროტსა თუ კეთილს გვაჩვენებს.
შოუს გამხსნელი ლუქი შავი ტყავის კაბა გახლდათ მოშიშვლებული მხრით. პირველი 17 სილუეტის შემდეგ, პოდიუმი თეთრმა კოსტიუმებმა მოიცვა. ჩვენების სტუმრებმა შავ-ბნელი სამყაროდან უეცრად ბედნიერი პატარძლებისა და ნიმფების გარემოცვაში გადაინაცვლეს.
მოდის სამყაროში დიზაინერს მოცულობითი სილუეტებითა და გრანდიოზული კაბებით იცნობენ. სირიანომ საფირმო ხელწერას არც ამ სეზონზე უღალატა და რამდენიმე ისეთი კაბა შემოგვთავაზა, რომლებსაც წითელ ხალიჩაზე, რომელიმე A-lister-ის სხეულზე აუცილებლად ვიხილავთ.
მიუხედავად იმისა, რომ კოლექციაში ბევრი ფერი არ იყო გამოყენებული, მრავალფეროვნების ნაკლებობას დიზაინერს ვერავინ დასწამებს. გამჭვირვალე, მაქმანიანი სამოსი შოუს წამყვანი ხაზი გახდა. "როცა ეს სამოსი გაცვია, ისე ჩანს, თითქოს ის მთელ სხეულზე ტატუირებულია" - აღნიშნა დიზაინერმა. მართლაც, მოდელებს შორიდან რომ შეხედო, მათ თითქოს არაფერი აცვიათ და იფიქრებ, ჭაობიდან ამოსულებმა პირდაპირ პოდიუმზე გადმოინაცვლესო.
კოლექციის შექმნისას სირიანომ თეთრისა და შავის გარდა, სხვა რამდენიმე ფერის გამოყენებით, საინტერესო დიზაინები შემოგვთავაზა. ამის ნათელი მაგალითია ვარდისფერი, ღია იასამნისფერი და ლურჯი სამოსი. განსაკუთრებით თვალისმომჭრელი კი დიდი ზომის ქვედაბოლოები და კაბებია.
ბუნებრივია, რომ ტყის, ბუნების, ელფებისა და ნიმფების საცხოვრებლით შთაგონებულ კოლექციაში, ყვავილები მრავლად გვხვდება. შოუს მთავარი გმირები ჯესიკა სტემი და კოკო როშა იყვნენ, რომლებიც სირიანოს ვერცხლისფერი ფერიების როლში გამოჩნდნენ. მოდელებს გამოყვანილი კაბები ეცვათ. კოკო მთლიანად ვერცხლისფერი იყო, ჯესიკას კი გამჭვირვალე, ტყის ელემენტებით ნაქარგი კაბა ამშვენებდა.
კოლექციას მისტიკურობას მოდელების მაკიაჟიც სძენდა. კრისტიანოს მოდელებს თვალები შავი ჩრდილებით ჰქონდათ შეღებული. ისინი დიზაინერის შემოქმედებას გამჭოლი მზერითა და საშიში გამოხედვით წარადგენდნენ.
ფოტო: Vogue
მაისის სამი დღის განმავლობაში აზერბაიჯანის დედაქალაქი იქცევა მოდის, ხელოვნებისა და ტექნოლოგიების საერთაშორისო პლატფორმად, სადაც დიზაინერები და კრეატიულ ინდუსტრიებთან დაკავშირებული ადამიანები შეხვდებიან ერთმანეთს.
Sex And the City-ს სპინოფი And Just Like That მესამე სეზონით ბრუნდება და მანჰეტენის თავგადასავლებში გვეპატიჟება. სეზონის პრემიერა 29 მაისს პლატფორმა Max-ზე შედგება. წინ გველის 12 ეპიზოდი — სავსე ზაფხულის ცხელი დღეებითა და უფრო ცხელი ღამეებით, რთული სასიყვარულო ურთიერთობებითა და ოჯახური დრამებით.
ჰარი პოტერის სერიალის პირველი ვარსკვლავური შემადგენლობა უკვე ცნობილია. ნახეთ, ვინ შეასრულებს დამბლდორის, სნეიპის, ჰაგრიდისა თუ მაკგონაგელის როლებს ახალ ეკრანიზაციაში.
