APPLA-მა დასაკეცი IPHONE DUO წარადგინა

Apple-ს სიახლე აქვს: ბრენდმა დასაკეცი iPhone წარადგინა. სექტემბრის პრეზენტაციის მთავარი სიახლე iPhone Duo გახდა, კომპანიის პირველი დასაკეცი სმარტფონი, რომლის ფასიც 1 999 დოლარიდან იწყება. Apple-ისთვის ეს iPhone-ის ახალი ეტაპია. Samsung-ისთვის კი ამბავი, რომელიც ჯერ კიდევ 2019 წელს მოვისმინეთ.

Samsung-მა პირველი Galaxy Fold 2019 წელს გამოუშვა და მას შემდეგ დასაკეცი სმარტფონების რამდენიმე თაობა შექმნა. Huawei, Honor, Xiaomi და სხვა ბრენდებიც წლებია ამ ფორმატს ავითარებენ. ამიტომ Apple-ის პრეზენტაციის შემდეგ Samsung-ის ირონიული რეაქციაც სრულიად მოსალოდნელი იყო: კომპანიამ კიდევ ერთხელ შეგვახსენა, რომ დასაკეცი ტელეფონების ეპოქა გუშინ არ დაწყებულა.

თუმცა Apple-ისთვის დაგვიანება უჩვეულო არაფერია. კომპანია ხშირად არ ცდილობს პირველი იყოს. ის აკვირდება, როგორ ვითარდება ახალი კატეგორია, ელოდება ტექნოლოგიის დახვეწას და შემდეგ საკუთარ ვერსიას გვთავაზობს. ამას კი ისე აკეთებს, რომ ცოტა ხანში მილიონობით მომხმარებელს უჩნდება განცდა, თითქოს სწორედ ამ პროდუქტს ელოდა წლებია. ასე მოხდა ჭკვიანი საათებისა და უსადენო ყურსასმენების შემთხვევაშიც. Apple-მა ზუსტად იცის როგორ შექმნას მოლოდინი.

iPhone Duo სწორედ ამ მიდგომის გაგრძელებაა. დაკეცილ მდგომარეობაში ის კომპაქტური iPhone-ია, გახსნისას კი დიდი ეკრანი რამდენიმე აპლიკაციის ერთდროულად გამოყენების საშუალებას იძლევა. მოგვიანებით Apple Pencil-ის მხარდაჭერაც დაემატება. ახალი იდეაა? არა. გამოსადეგია? საკმაოდ შესაძლებელია.

Samsung-მა დასაკეცი ტელეფონი წლების წინ გამოუშვა. Apple კი თამაშს ახლა შეუერთდა და თან საკმაოდ მაღალი ფასით. როგორც ხშირად ხდება, საკმარისია Apple სცენაზე გამოჩნდეს, რომ დასაკეცი ტელეფონები ისევ ტრენდად იქცეს.

Duo-სთან ერთად კომპანიამ iPhone 18 Pro და Pro Max-იც წარადგინა ახალი A20 Pro ჩიპით, გაუმჯობესებული კამერებითა და ხელოვნურ ინტელექტზე დაფუძნებული ფუნქციებით.