გიორგი ქებურიამ ლონდონის მოდის კვირეულზე 2026 წლის გაზაფხული/ზაფხულის კოლექცია წარადგინა. ახალი ნამუშევრები ისტორიულ და თანამედროვე მოდას შორის ქმნიდა დიალოგს. პოდიუმზე ვიხილეთ სამხედრო სტილის ღილები და სამეფო სიმბოლიკა, რაც თეატრალურ განწყობას აძლევდა შოუს.
 |
 |
გამოკვეთილი, ფართო მხრები, გველის პატერნი, კოსტიუმები მკვეთრი ჭრებითა და გეომეტრიული ხაზებით – ეს ყველაფერი კოლექციას მკაცრ ხასიათს ანიჭებდა. სამოსში იგრძნობოდა როგორც სამეფო დაცვის უნიფორმების, ისე კარის ჯამბაზის კოსტიუმების თანამედროვე ინტერპრეტაცია – მოცულობითი ფერადი შორტებითა და კაბებით. სირბილესა და სტრუქტურალიზმს შორის დინამიკა მთელ კოლექციაში იკითხებოდა.
 |
 |
სამოსის ნაწილი მკაცრად არქიტექტურული იყო, ნაწილი კი თავისუფალი და მოქნილი. ერთ-ერთი მთავარი გმირი აბრეშუმი გახლდათ, რომელიც როგორც კაბებში, ისე შორტებში გვხვდებოდა. განსაკუთრებული ყურადღება მიიპყრო შორტებმა საქართველოს დროშის გამოსახულებით.
 |
 |
აქსესუარებში მთავარი ადგილი ეკავა მაღალყელიან ჩექმებს. ერთ-ერთი ლუქის გამორჩეული დეტალი იყო ქამარი სავარცხლის ელემენტით, ასევე გამოყენებული იყო ქამრები მასიური ლითონის დეტალით და გასაღების საკიდის ფორმის უზარმაზარი აქსესუარი.
გასაღები ქებურიას თანმხლები სიმბოლოა და მისი შემოქმედების თემას – კონტროლსა და თავისუფლებას, ძალაუფლებასა და ჯანყს შორის დაპირისპირებას უსვამს ხაზს. ეს განწყობა განსაკუთრებით გაძლიერდა ქართველი ანდერგრაუნდ ჰიპ-ჰოპ არტისტის, მამაფლექსის მუსიკით, რომელიც შოუს ფონად გასდევდა.
 |
 |
ქებურიასთვის დამახასიათებელი არქიტექტურული სილუეტები და სიმეტრია კვლავ თვალსაჩინო იყო, თუმცა თავისუფალი სამოსი კოლექციას უფრო მსუბუქ და თანამედროვე სახეს აძლევდა.
 |
 |
პოდიუმზე ასევე გამოჩნდა ქებურიას სტილის მაისურები სხვადასხვა ფერის კანტით და წარწერებით – Fakeholic და BYE ANNA, რომელიც ანა ვინტურის ამერიკული Vogue-ის მთავარი რედაქტორის პოსტიდან წასვლაზე მინიშნება იყო.
 |
 |
გიორგი ქებურიას 2026 წლის გაზაფხული/ზაფხულის კოლექცია დახვეწილი, დინამიკური და თანამედროვე გახლდათ, რაც კიდევ ერთხელ უსვამს ხაზს მის ინდივიდუალურ ხელწერას საერთაშორისო მოდის სცენაზე.
ფოტო: georgekeburia
Christian Siriano-მ ნიუ-იორკის მოდის კვირეულზე 2026 წლის გაზაფხული-ზაფხულის კოლექცია წარადგინა. პოდიუმზე კოპლები, ზოლები და კუბოკრული პრინტები ძველი ჰოლივუდის ელეგანტურობასთან ერთად თანამედროვე ფორმებში გაერთიანდა.
Naked Dress წითელი ხალიჩის განუყოფელი ნაწილია. ბოლო პერიოდში, ეს თამამი სტილი მარგო რობიმ, ტეიტ მაკრეიმ და დაკოტა ჯონსონმა მოირგეს და წითელ ხალიჩაზე დაუვიწყარი მომენტები შექმნეს.
სილამაზის მოყვარულთათვის თბილისში კიდევ ერთი ახალი სივრცე გამოჩნდა. Glossy Nail Bar, რომელიც მოსკოვის გამზირზე, N9-ში მდებარეობს ოფიციალურად 7 სექტემბერს გაიხსნა.
