| ანნა მათიაშვილი |
ვისაც უეს ანდერსონის შემოქმედება ჩემსავით გიყვართ, ალბათ, ყველას გისურვიათ მის ფერად და ორიგინალურ სამყაროში ცხოვრება. რეჟისორის კინემატოგრაფია ყველასგან გამორჩეულია. შეუძლებელია მისი რომელიმე ფილმის კადრი ნახო და მაშინვე არ ამოიცნო განუმეორებელი ხელწერა. მან, როგორც კინორეჟისორმა, უნიკალური სიუჟეტებითა და ვიზუალურად გასაოცარი სცენებით, საკუთარი ნიშა შექმნა. მის ყოველ ახალ ფილმში გამორჩეულ არქიტექტურულ სტილს, პერსონაჟებად ქცეულ ოთახებსა და ინტერიერს ვხვდებით, რომლებიც ისეთივე მნიშვნელოვან როლს თამაშობენ, როგორც მსახიობები.
უეს ანდერსონის კინემატოგრაფიის ერთ-ერთი ყველაზე გამორჩეული ნიშანი სიმეტრიულობაა.
რეჟისორის ყველა კადრი “მათემატიკური” სიზუსტითაა შექმნილი და იმდენად სიმეტრიულია, რომ მაყურებლის თვალს მაშინვე უსაზღვრო სიამოვნებას აგრძნობინებს. ბალანსის, წესრიგისა და სიზუსტის სიყვარული მისი ფილმების ყველა ელემენტზე ვრცელდება. იდეალურად სიმეტრიული დეტალები ვიზუალურ კომპოზიციას ჰარმონიულს ხდის, თუმცა ამავდროულად მის ხელოვნურობას უსვამს ხაზს. ამერიკელი რეჟისორი მაყურებელს ხელოვნურად შექმნილ არაამქვეყნიურ სამყაროში მოგზაურობით საშუალებას აძლევს, ქაოსურ, უკონტროლო რეალობას ცოტა ხნით მაინც გაექცეს.
"სასტუმრო გრანდ ბუდაპეშტი"
უეს ანდერსონის ნამუშევრებიდან, ალბათ, ყველაზე ცნობილი “სასტუმრო გრანდ ბუდაპეშტია”, რომელიც სიუჟეტის მიხედვით გამოგონილ დუბროვკას რესპუბლიკაში მდებარეობს. სასტუმროს ყოველი სართულის ინტერიერი მისი ისტორიის გარკვეულ პერიოდს ასახავს. მიუხედავად იმისა, რომ სასტუმროს დიზაინი უეს ანდერსონის წარმოსახვაში შეიქმნა, ფილმი რეალურ ადგილას, გერმანიის უძველეს სავაჭრო ცენტრშია გადაღებული. “გრანდ ბუდაპეშტის” პასტელური ფერები კი, რომლებიც 1950-იანი და 1960-იანი წლების ესთეტიკას აღვიძებს, ეკრანზე ნამდვილად რეჟისორის გონებიდან გადმოვიდა.
“The Royal Tenenbaums”
უეს ანდერსონის შემოქმედება მაგალითია იმისა, თუ როგორ შეიძლება სახლის ინტერიერი ადამიანის შინაგანი სამყაროს ამსახველად აქციო. ფილმში “The Royal Tenenbaums” ტენენბაუმების უჩვეულო ოჯახზე გვიყვება. მათი ნიუ-იორკში მდებარე სახლის დიზაინი ისეთივე ექსცენტრული და არაორდინალურია, როგორც თავად პერსონაჟების ხასიათი. მარგოს ოთახი, ზებრას პრინტის შპალერითა და სათამაშო ბილიკებით, მის იდუმალ ბუნებასა და ბავშვობაზე გვიყვება. რიჩის საძინებლის დეტალები კი მის წარუმატებელ საჩოგბურთო კარიერას გვახსენებს. ვინტაჟური სპორტული აღჭურვილობა და ჯილდოებით სავსე თაროები ტენენბაუმის შეუსრულებელ მიზანსა და წარუმატებლობას ასახავს.
“The Darjeeling Limited”
სიუჟეტი ინდოეთისკენ მიმავალ მატარებელში მიმდინარეობს და მისი ინტერიერი ერთგვარად პერსონაჟების, სამი ძმის ემოციურ მოგზაურობაზე გვიყვება. კუპეები წითელი, ოქროსფერი და ლურჯი ფერებითაა გაჟღენთილი, რითაც რეჟისორი ინდოეთის მდიდარი კულტურის წარმოჩენას ცდილობდა. მატარებლის დეკორი ისტორიებს პირველი კლასის მდიდრული სალონებიდან, ქვედა კლასების მოკრძალებულ სივრცეებამდე მოგვითხრობს. ერთ-ერთი პერსონაჟის როლს მატარებელიც თამაშობს და მისი დიზაინით ამერიკელი კინორეჟისორი არაჩვეულებრივად აღწერს აღმოსავლეთის ესთეტიკას.
უეს ანდერსონის ფილმებში არქიტექტურა და დიზაინი ხშირად თხრობის მექანიზმია, რომელსაც პერსონაჟების ემოციები, ისტორიები და ქმედებები ჩვენამდე, მაყურებლამდე მოაქვს. შედეგად ფილმების მნიშვნელოვანი კომპონენტი არა მხოლოდ დასამახსოვრებელი პერსონაჟები და უჩვეულო ისტორიები, არამედ ინტერიერიც ხდება. უეს ანდერსონი გვარწმუნებს, რომ არქიტექტურული ელემენტებისა და დეკორის მნიშვნელობა იმაზე მეტია, ვიდრე უბრალოდ მისი სილამაზე, დანიშნულება და ფიზიკური კონტექსტი.
თბილისის კულტურულ გზამკვლევს ეროვნულ გალერეამდე მივყავართ, სადაც ქართველი ცნობილი თუ დავიწყებული მოქანდაკეების ნამუშევრები დაგხვდებათ. გამოფენა “ქანდაკების კოლექცია” ქართული მრგვალი ქანდაკებების ვიზუალურ მახასიათებლებს გვაცნობს და მის 100-წლიან ისტორიას მიჰყვება.
ამჯერად, გირჩევთ თვალი იტალიური პრემიუმ ბრენდის - TWINSET-ის 2024 წლის გაზაფხული-ზაფხულის კოლექციას გადაავლოთ, რომელიც მსუბუქ ფერთა პალიტრას, დახვეწილ სილუეტებსა და გამორჩეულ აქსესუარებს აერთიანებს.
ალბათ, უკვე ყველამ დაიწყეთ ზაფხულის ცხელი დღეების დაგეგმვა. თუ დანიშნულება ჯერ კიდევ არ აგირჩევიათ, დუბაი საუკეთესო ვარიანტია შვებულების მრავალფეროვნად გასატარებლად.
