ნიუ-იორკის მოდის კვირეულმა კიდევ ერთხელ დაამტკიცა, რომ ეს ქალაქი გახლავთ გლობალური მოდის ეპიცენტრი. ამ სეზონზე, მოდის კვირეულზე დიზაინერებმა წარმოგვიდგინეს არამხოლოდ ნატიფი, დახვეწილი კოლექციები, არამედ საკმაოდ თამამი სამოსი ციფრული შოუებით. ექვსდღიანმა მოდის მარათონმა უდიდესი შთაბეჭდილება დაგვიტოვა თავისი დაუვიწყარი მომენტებით, ინოვაციური დიზაინითა და საინტერესო კოლაბორაციებით.
მაიკლ კორსმა კოლექცია იტალიის არტიზანულ კულტურას მიუძღვნა. "დიზაინერისთვის, ყველაზე მნიშვნელოვანი ისეთი ადამიანების პოვნაა, რომლებსაც შენი იდეების რეალიზება შეუძლიათ. ამას იტალიელი არტიზანები ჩემთვის უკვე 35 წელია აკეთებენ" - ამბობს მაიკლ კორსი.
კოლექცია იმ ადამიანების შრომას ეძღვნება, რომლებიც სამოსს ხორცს ასხამენ და ხელით ისეთ შედევრებს ქმნიან, რისი ტარებაც ყველას ასე ძალიან გვიყვარს.
Tory Burch-მა კი კოლექციის ინსპირაციის ძიებისას სპორტს მიაკითხა. დიზაინერმა სპორტული სამოსის ელემენტებს თანამედროვე, მოდური ელფერი შესძინა. კოლექციის მისია კი ის არის, რომ სამოსში გამოწყობილმა ადამიანებმა თავდაჯერებულად იგრძნონ თავი.
"ჩემთვის ყველაფერი ქალების ირგვლივ ტრიალებს", - ტორი ბერჩი.
მე სამოსს არ ვქნი იმის მიხედვით, თუ რას ჩავიცვამდი თავად. ჩემს შემოქმედებაში ჩანს, თუ როგორ ვხედავ ქალებს. ჩემს წარმატებას განსაზღვრავს ის, თუ რამდენად თავდაჯერებულად და ძლიერად გრძნობენ ქალები ჩემს სამოსში თავს, - აღნიშნავს დიზაინერი.
უეს გორდონის მიერ, კაროლინა ჰერერასთვის შექმნილ კოლექციაში დომინანტ ადგილს შავი, თეთრი, ღია ვარდისფერი და მკვეთრი ყვითელი ფერები იკავებდნენ. კოლექციას სახელად "Optimism At Play" ჰქვია. უეს გორდონის დიზაინებს მკვეთრი ფერები და თვალშისაცემი სილუეტები ყოველთვის ახასიათებდათ. ნიუ-იორკის კვირეულის პოდიუმზეც უზარმაზარი ყვითელი კაბით ირინა შეიკი გამოჩნდა.
ურბანული, რეალური გარემო გახდა სტუარტ ვევერსის ინსპირაციის წყარო. Coach-ის კოლექცია ამერიკული კლასიკის ხელახალი ინტერპრეტაციის მცდელობაა. ნიუ-იორკის პოდიუმი Smart&Casual სტილის სამოსმა დაიპყრო. ვიხილეთ სპორტულ ტანსაცმელზე შემოცმული პიჯაკები თუ აბრეშუმის, კლასიკური კაბები სპორტულ ფეხსაცმელთან ერთად.
რალფ ლორენი ნიუ-იორკის მოდის კვირეულზე ექსტრავაგანტური ჩვენებით წარსდგა. ჩვენება Hamptons-ში გაიმართა და მოდელებმა Ralph Lauren Collection, Purple Label და Polo Ralph Lauren-ის ნაზავი წარადგინეს. პოდიუმზე ნაომი კემპბელი და კრისტი ტერლინგტონი გამოჩნდნენ.
კოლექცია ზუსტად ესადაგებოდა Hamptons-ის სანაპიროს, ზღვის ესთეტიკას. ფერების პალიტრაში თეთრი და ცისფერი დომინირებდა.
2025 წლის გაზაფხული/ზაფხულის კოლექციისთვის ინსპირაციად ტომი ჰილფიგერმაც საზღვაო ესთეტიკა ამოარჩია. ოღონდ, სამოსი ძირითადად ჰილფიგერის დამახასიათებელ წითელ, თეთრ და ლურჯ ფერებშია გადაწყვეტილი.
სხვა HIGHLIGHT-ები
პოპვარსკვლავი რიანა ბრენდ Alaïa-ს ჩვენებას დაესწრო. ბრენდის კოლექციაზე კრეატიულმა დირექტორმა პიტერ მულიერმა იმუშავა.
Kim Shui-ს ჩვენებაზე ოლიმპიური ჩემპიონი ჯორდან ჩაილსი გამოჩნდა.
გამორჩეული იყო Grace Ling-ის კოლექციაც, რომელშიც მეტალი მთავარ გმირად იქცა და დიზაინერმა სიურრეალისტური, ფანტასტიკური ლუქები შექმნა. სამოსი სკულპტურას მოგვაგონებს, რომელიც თითქოს მოდელის სხეულზეა გამოქანდაკებული.
ღრმა დეკოლტეები და უზომოდ მოკლე ქვედაბოლოები კვირეულზე წარდგენილ Off-White-ის კოლექციის მთავარი ხაზი გახდა. კოლექცია იბრაჰიმ კამარას წინაპრების სამშობლოში, განაში მოგზაურობით იყო შთაგონებული.
Wiederhoeft-ის დიზაინერმა კორსეტი შოუს მთავარ ელემენტად აქცია. ამ ბრენდის საქორწინო კოლექცია ნებისმიერი ზომის სამოსს გვთავაზობს. პოდიუმზეც, სამოსი სხვადასხვა წონისა და სიმაღლის მოდელებმა წარადგინეს.
Vetements-ის 2025 წლის გაზაფხულის ჩვენება პარიზის მოდის კვირეულზე, 27 სექტემბერს გაიმართა, სადაც პოდიუმზე ნამდვილი ვარსკვლავთცვენა ვიხილეთ. ბრენდის ჩვენება, რომელიც ძმებმა გვასალიებმა 2014 წელს დააფუძნეს, ტრევის სკოტმა გახსნა. ამერიკელი რეპერი ბაიკერის შავი ტყავის სამოსში იყო სრულად შემოსილი.
ბოტეგა ვენეტას სახლმა, მილანის მოდის კვირეულის მიწურულს, სიურპრიზებით სავსე კოლექცია წარადგინა. ჩვენთან ერთად შეავლეთ თვალი, თუ როგორ გამოიყურებოდნენ ბოტეგა ვენეტას გაზაფხული/ზაფხულის შოუს წინა რიგებში მოკალათებული ცნობილი ადამიანები.
გსმენიათ ლაბორატორიაში შექმნილი ბრილიანტების შესახებ? რა არის ლაბორატორიული ბრილიანტი და რატომ არის ის საუკეთესო არჩევანი - ამის შესახებ დღევანდელ სტატიაში შეიტყობთ.
