დემნა გვასალიამ 2027 წლის კრუიზის კოლექცია GucciCore მსოფლიოს ერთ-ერთ ყველაზე ხალხმრავალ წერტილში – ნიუ-იორკის Times Square-ზე წარადგინა. ბრენდმა საკულტო ქალაქის შუაგულში პოდიუმი მოაწყო, ხოლო გიგანტური ეკრანები, ბილბორდები და ტურისტული ცენტრი შოუს დეკორაციად აქცია.
ორგანიზების სირთულისა და მასშტაბების გამო, პროექტი მკაცრად გასაიდუმლოებული იყო, ამიტომაც სტუმრებმა ზუსტი ლოკაცია ჩვენებამდე მხოლოდ რამდენიმე საათით ადრე შეიტყვეს.
შოუს დაწყებამდე მოედანზე ათეულობით ეკრანზე ერთდროულად ჩაირთო ვიდეორგოლი, სადაც ბუნების, პეიზაჟებისა თუ მზის ჩასვლის კადრებს პერიოდულად Gucci-ს ფიქციური რეკლამები ანაცვლებდა. Gucci Acqua, Gucci Gym, Gucci Pets და Gucci Life – ეს გამოგონილი პროდუქტები დემნას ირონიულ დამოკიდებულებას ასახავდა იმ აგრესიული მარკეტინგის მიმართ, რომელიც ჩვენი ყოველდღიურობის ნაწილია.
დემნა ამ გზით თანამედროვე კომერციული სამყაროს აბსურდულობას უსვამდა ხაზს, სადაც პროდუქტის გაყიდვას ხშირად სილამაზისა და ბუნებრიობის იდეებით შეფუთულ ფორმაში ცდილობენ. ამ იდეის ყველაზე ზუსტი გამოხატულება კი თავად Times Square-ია.
თავად კოლექცია კი საკმაოდ პრაქტიკული და რეალისტური გახლავთ. დემნამ ის საბაზისო ნივთები წარადგინა, რომლებიც ბრენდს ბოლო წლებში აკლდა.
დემნას Gucci-ს კოლექციების კონცეფცია სხვადასხვა ქალაქისა და კულტურის არქეტიპების კვლევას ეფუძნება. თუ La Famiglia იტალიურ სტილს მიეძღვნა, ამჯერად ფოკუსში ნიუ-იორკელები მოექცნენ – ადამიანები, რომლებიც ნიუ-იორკის ქუჩებში, ოფისებსა თუ მეტროში ყოველდღიურად დაიარებიან.
 |
 |
ვიხილეთ მკაცრი ჭრები, კლასიკური ზოლიანი კოსტიუმები თუ თავისუფალი სილუეტები. კოლექციის ნაწილი იყო მოკლე ტყავის ქურთუკები, ქვედაბოლოები და ბეწვის ელემენტები. მიუხედავად იმისა, რომ ზოგიერთი ლუქი თეატრალური და არაპრაქტიკული იყო, კოლექციის ძირითადი ნაწილი ექსტრავაგანტურობისა და ყოველდღიურობის ბალანსს ინარჩუნებდა.
 |
 |
შოუს კონცეფციის საუკეთესოდ წარმოჩენაში მნიშვნელოვანი როლი ითამაშა კასტინგმა. დემნას სურდა, პოდიუმზე რეალური ნიუ-იორკი გამოეყვანა, რის გამოც მოდელების გარდა, შოუში მონაწილეობა მიიღეს ხელოვნების, მუსიკის, სპორტისა და პოპკულტურის წარმომადგენლებმა.
სპორტსმენი ტომ ბრედი შავ ტყავის ლუქში გამოეწყო, სინდი კროუფორდმა კი ჩვენება შავი ბუმბულებიანი კაბით დახურა. პოდიუმზე ასევე ვიხილეთ პერის ჰილტონი, ალექს კონსანი, ემილი რატაკოვსკი და ქენდის სვეინპოლი.
 |
 |
ამ ყველაფრის პარალელურად, ტაიმზ-სკვერი ჩვეულ რეჟიმში აგრძელებდა ცხოვრებას, ისმოდა სირენები, მოძრაობდა ტრანსპორტი და ირეოდნენ ტურისტები. სწორედ ეს ურბანული ქაოსი იქცა შოუს მთავარ ღერძად.
 |
 |
ჩვენებაზე ვიხილეთ ლიმიტირებული კაფსულა კოლექცია Gucci NY, რომელიც ნიუ-იორკით შთაგონებულ ჩანთებს, აქსესუარებსა და ფეხსაცმელს აერთიანებს. შოუს დასრულებისთანავე ეს ხაზი ხელმისაწვდომი გახდა ქალაქის ბუტიკებსა და ბრენდის ონლაინ პლატფორმაზე.
მთელმა მსოფლიომ იცის, რომ დემნა გვასალია Kering-ში კონკრეტული მისიითაა მისული – გაზარდოს ბრენდის გაყიდვები და შემოსავალი. ამიტომაც, ეს კოლექცია კომპანიისთვის სტრატეგიულ მნიშვნელობას ატარებს. დემნამ ის კომერციული გათვლები, რომელიც Balenciaga-ში გამოიყენა, ახლა Gucci-ში უნდა გაიმეოროს. გვასალიას ესმის, თუ როგორ გახადოს კონცეპტუალური იდეები გაყიდვად პროდუქტებად. ეს უკანასკნელი კი სწორედ კრუიზის კოლექციამ დაამტკიცა.
შოუ მასშტაბური სანახაობა იყო, რითაც დემნამ Gucci-სთვის შექმნა ახალი, სტაბილური ვიზუალური ენა, რომელიც ერთდროულად ბრენდის იდენტობასაც ინარჩუნებს, დიდი ალბათობით კომერციულად გაამართლებს და Gucci-ს ყოველდღიურობაში დააბრუნებს.
Lisi Wonderland-ის თავდაგასავალს ლეგენდარული ფრანგული კონიაკის სახლი - Hennessy წელს პირველად შეუერთდა. ფესტივალი დიდი ხანია გასცდა მხოლოდ მუსიკალური ღონისძიების ჩარჩოებს - ის თავისუფლების, კრეატიულობისა და თანამედროვე ურბანული კულტურის მთავარ სიმბოლოდ იქცა. სწორედ ამიტომ, Hennessy-ის ფესტივალზე გამოჩენა აბსოლუტურად ბუნებრივი და ორგანული ნაბიჯი იყო.
Balenciaga-ს მაღალი მოდის კოლექციის ჩვენება პარიზში, Cité internationale universitaire-ის ბაღებში გაიმართა და თითქოს პასუხია კითხვაზე, როგორი შეიძლება იყოს Balenciaga დემნას შემდეგ. პიჩოლის პასუხი რომანტიკულია, მაგრამ არა სენტიმენტალური.
ზენდაია „ოდისეას“ პარიზის პრემიერაზე Givenchy Haute Couture-ის 1997 წლის ლუქით გამოჩნდა, რომელიც Alexander McQueen-ის პირველი კოლექციიდანაა Givenchy-ისთვის.
