მოდის სამყაროში ერთ-ერთი ყველაზე მნიშვნელოვანი პოზიცია ვაკანტური აღარ არის. დიდი მოლოდინის შემდეგ, ანა ვინტურმა Vogue-ის ამერიკული გამოცემის სარედაქციო კონტენტის ხელმძღვანელად ქლოე მალი დანიშნა. ეს არის ახალი თავი ჟურნალის ისტორიაში და მნიშვნელოვან ცვლილებს მოასწავებს. თუმცა უნდა აღინიშნოს, რომ მალის როლი ზუსტად იგივე არ არის, რაც მთავარი რედაქტორის თანამდებობა, რომელსაც ვინტური თითქმის 40 წლის განმავლობაში იკავებდა.
ის, თუ ვინ შეცვლიდა ოდესმე ლეგენდარულ ანა ვინტურს, მოდის სამყაროში ყოველთვის აქტუალური კითხვა იყო. საბოლოოდ კი ვინტურმა არჩევანი სანდო და გამოცდილ კოლეგაზე შეაჩერა. 39 წლის ქლოე მალი 2011 წლიდან Vogue-ში მუშაობს და ჟურნალის ციფრულ ეპოქაზე გადასვლაში უდიდესი წვლილი აქვს შეტანილი.
2023 წლიდან, როგორც Vogue.com-ის რედაქტორმა, მალიმ ორჯერ გაზარდა საიტის აქტიურობა და მნიშვნელოვნად გააუმჯობესა ისეთი მაჩვენებლები, როგორიცაა უნიკალური ნახვები და მკითხველის მიერ საიტზე გატარებული დრო, განსაკუთრებით ისეთი ღონისძიებების დროს, როგორიცაა Met Gala. მალის ინიციატივით შეიქმნა ახალი ფორმატები: Dogue და Vogue Vintage Guide. ის პოდკასტის The Run-Through with Vogue თანაწამყვანიც გახლავთ.
მიუხედავად ამ ცვლილებისა, 75 წლის ვინტური Vogue-ს არ ტოვებს. ის Condé Nast-ის გლობალური კონტენტის დირექტორისა და Vogue-ის გლობალური სარედაქციო ხელმძღვანელის როლზე აგრძელებს მუშაობას. ეს კი იმას ნიშნავს, რომ ამერიკული გამოცემის ყოველდღიურ მართვას მალი ჩაუდგება სათავეში, ხოლო ვინტური უფრო დიდ პასუხისმგებლობებს აიღებს და საერთაშორისო გამოცემებზე იქნება კონცენტრირებული.
ქლოე მალის სახელი მოდის კულისებს გარეთ ნაკლებად ცნობილია, თუმცა მას ძალიან წარმატებული კარიერა აქვს. ის მსახიობ ქენდის ბერგენისა და ფრანგი რეჟისორის, ლუი მალის, ქალიშვილია. Vogue-ში კარიერა მან 2011 წელს დაიწყო, როდესაც სოციალურ და საქორწილო კონტენტს უძღვებოდა.
მალის თქმით, თავიდან მოდა მისი მთავარი ინტერესი არ იყო: „უფრო მწერლობა მინდოდა, ვიდრე რედაქტორობა, მაგრამ Vogue-ის სამყარო იმდენად საინტერესო აღმოჩნდა, რომ წინააღმდეგობა ვერ გავუწიე“.
ჟურნალისტური გამოცდილებისა და ციფრული ინოვაციების ცოდნამ სწორედ მალი აქცია იმ ადამიანად, რომელსაც დღეს Vogue-ის ამერიკული გამოცემის შემოქმედებითი მიმართულების ხელმძღვანელობა ჩაბარდება.
„Vogue-მა შემქმნა იმად, ვინც ახლა ვარ. მიხარია, რომ ახლა თავად უნდა მივიღო მონაწილეობა Vogue-ის მომავლის ფორმირებაში“, – ქლოე მალი.
ლოს-ანჯელესში გამართულ Academy Museum Gala 2025-ზე ჰოლივუდის წამყვანი მსახიობები და მოდის სახლები შეიკრიბნენ, რათა აღენიშნათ კინოს კულტურა და წარმოეჩინათ მაღალი მოდის თანამედროვე ტენდენციები.
TheDiary Concept House თბილისის შუაგულში მდებარე მულტიფუნქციური სივრცეა, სადაც ერთიანდება კონცეპტუალური მაღაზია, ყავის ბარი, ფოტო და ვიდეო სტუდია და ონლაინ ჟურნალი The Diary. აქ ტარდება ღონისძიებები, გამოფენები და ბრენდების პრეზენტაციები, ხელმისაწვდომია ქართული დიზაინის ნამუშევრები და სტუმრებს შეუძლიათ ისიამოვნონ ყავით ან ღვინით.
ევროკომისიამ საცალო პარტნიორებისთვის ფასების ფიქსირების გამო Gucci, Chloé და Loewe 157 მილიონი ევროს ოდენობით დააჯარიმა. ეს შემთხვევა ცხადყოფს, თუ როგორ ეჯახება ფუფუნების სამყაროს იმიჯის შენარჩუნება ბაზრის სამართლიანობის პრინციპებს და სად გადის ზღვარი ექსკლუზიურობასა და კანონის დარღვევას შორის.
