| ანნა მათიაშვილი |
2024 წლის გაზაფხულზე სამხრეთ საფრანგეთში, Fondation Maeght-ის ხელოვნების მუზეუმში გამართული ჩვენების შემდეგ, სიმო პორტ ჟაკმუსმა კოლექციის წარსადგენად კიდევ ერთი საკულტო ლოკაცია შეარჩია. ფრანგი დიზაინერი, რომელიც მზიანი ხმელთაშუა ზღვის ესთეტიკაზეა შეყვარებული, 15 წლის საიუბილეო ჩვენებას კაპრიზე, Casa Malaparte-ში გამართავს, ერთი კვირით ადრე კი იტალიის კუნძულზე ახალი მაღაზიაც გახსნა. ჟაკმუსმა არაერთხელ დაგვამახსოვრა თავი მოდის, გასაოცარი არქიტექტურისა და ბუნების სინთეზით, გამონაკლისი კი არც აღნიშნული მაღაზია და 10 ივნისს გამართული ჩვენება იქნება.
როგორც ცნობილია, Casa Malaparte სპეციალურად Jacquemus-ის ჩვენებისთვის გაიხსნება და ისტორიაში პირველად უმასპინძლებს მოდის სახლის კოლექციის წარდგენას.
კლდეზე აღმართული ნაგებობა ტირენიის ზღვის ულამაზესი ხედებით, დრამატული არქიტექტურითა და უნიკალური მდებარეობით ჟაკმუსის დღესასწაულისთვის შესანიშნავ ფონს წარმოადგენს. 1930-იანი წლების ბოლოს კურციო მალაპარტესთვის აშენებული სახლი მოდერნისტული არქიტექტურის შედევრია, რომელიც კაპრის პეიზაჟთან შერწყმით გასაოცარ სურათს გვიხატავს. მისი მკვეთრი, გეომეტრიული ხაზები და ტერაკოტის ფერი თვალისმომჭრელ კონტრასტს ქმნის მის გარშემო არსებულ ბუნებრივ სილამაზესთან. ეს ყველაფერი კი Casa Malaparte-ს იდეალურ სცენად აქცევს Simon Porte Jacquemus-ის უახლესი შემოქმედებისთვის.
ვილა მალაპარტემ არქიტექტურის მშვენიერებითა თუ თვალწარმტაცი ხედებით არაერთი რეჟისორის ყურადღება მიიპყრო. ნაგებობა რამდენიმე ფილმში იჩენს თავს, მათ შორის, ყველაზე მეტად ჟან ლუკ გოდარის ფილმი “Le Mepris” არის ცნობილი. ბრიჯიტ ბარდოსა და მიშელ პიკოლისთან ერთად კურციო მალაპარტეს სახლი ფილმის პერსონაჟად გვევლინება. საინტერესო ფაქტია, რომ იგი ჟაკმუსისთვის განსაკუთრებულ დატვირთვასაც ატარებს. როგორც დიზაინერმა ინსტაგრამ პოსტით გაგვანდო, მან სწორედ ამ ფრანგული ახალი ტალღის ფილმის ყურების შემდეგ გადაწყვიტა საკუთარი ბრენდის შექმნა. ფრანგულ მოდის სახლს 15 წელი სწორედ იქ უსრულდება, სადაც მისი ისტორია თავდაპირველად დაიწყო.
მიუხედავად იმისა, რომ კოლექციის შესახებ დეტალები საიდუმლოდ რჩება, ჩვენებაზე ჟაკმუსის მხიარული ფერების პალიტრასა და არატრადიციულ სილუეტებს უნდა ველოდოთ. ფრანგული ბრენდი მუდმივად სცილდება დაწესებულ ჩარჩოებს და თავიდან განსაზღვრავს თანამედროვე მოდას. ეს საიუბილეო კოლექცია რეტროსპექტიული იქნება და ბრენდის ევოლუციას დასაწყისიდან მიჰყვება. წარსულთან ერთად დიზაინერი კოლექციაში ბრენდის სამომავლო ხედვასაც წარმოაჩენს - Casa Malaparte-ს კედლებში ნათლად გამოჩნდება ჟაკმუსის როლი და გავლენა თანამედროვე მოდაზე. მოდის ბრენდის განვითარების გზა განსაკუთრებით საინტერესოა, იმის გამო, რომ ჟაკმუსი დღემდე დამოუკიდებლად აგრძელებს არსებობას, რაც მოდის ინდუსტრიაში არც ისე ხშირია. შარშან ბრენდის გაყიდვებმა 200 მილიონს მიაღწიეს, ხოლო 2025-ისთვის ნახევარ მილიარდს ელოდებიან.
თუ კაპრის თვალწარმტაც პეიზაჟებსა და ჟაკმუსის მოდურ ტანსაცმელს გავითვალისწინებთ, შეუძლებელია Casa Malaparte-ს შოუ A-lister-ების დაუვიწყარ თავშეყრის ადგილად არ იქცეს.
სან-ტროპესა და ნიცას შემდეგ, Capri Boutique-ის გახსნაც არავის გვიკვირს, თანაც ბრენდის საიუბილეო წელს. მაღაზია ქვის კედლის ქვეშ ნეაპოლის ყურის გასწვრივ მდებარეობს. ჟაკმუსი კუნძულისა და ფირუზისფერი ზღვის სილამაზეს მაქსიმალურად იყენებს და სოციალურ ქსელში ბუნებაში გადაღებულ სხვადასხვა ვიდეოს გვიზიარებს. მათ შორის ტანსაცმლის მასას, რომელიც ტირენიის ზღვაზე მიცურავს, სერფინგის დაფაზე მდგარ ახალგაზრდა მამაკაცს, რომელიც ტანსაცმელს აუთოებს, ველოსიპედით მიმავალ კაცს, რომელსაც Jacquemus-ის ცნობილი პანამები ადგას თავზე. საინტერესო დეტალი კი მაღაზიის გახსნის ცერემონიალზე შეინიშნებოდა, სადაც ბრენდის გუნდის წევრები მაღაზიის გასწვრივ დიდი ზომის საკერავი ხელსაწყოებით მოძრაობდნენ. ხელებში კი დიდი ყვითელი ღილიდან დაწყებული, საზომი ლენტითა და მაკრატლით დამთავრებული, ყველაფერი ეკავათ, რაც ტანსაცმლის დიზაინების რეალობად ქცევაში ეხმარებათ.
ამიერიდან, ბრენდის ორიგინალური და ფერადი ტანსაცმლის შეძენა ტირენიის ზღვის კუნძულზეც შეგიძლიათ პეიზაჟებით ტკბობასთან ერთად.
სალომე გორგილაძე პორტუგალიაში მოღვაწეობს და სასტუმროთა ქსელის SANA Hotels-ის დირექტორთა საბჭოს წევრი და ხელმძღვანელია. ეს ახალგაზრდა ქართველი ქალი ყველაზე ნათელი მაგალითია იმისა, თუ როგორ ფასდება ევროპაში განათლება, მიზანდასახულობა და ულევი შრომა.
“რა გიყვარს ჩემში” თერაპიული დღიურია, რომელიც ავტორიც პროფესიით ჟურნალისტი ნატა ტაბიძეა. არასტანდარტული ფორმატის დღიურის პრეზენტაცია თბილისის წიგნის საერთაშორისო ფესტივალზე შედგა, თუმცა ამ შემთხვევაში ყველა წიგნს განსხვავებული ბოლო ექნება.
ორი დის მიერ წამოწყებული სტარტაპი უკვე შვიდი წელია, რაც ქართველი მომხმარებლის საყვარელ პროდუქტს ქმნის. საყვარელი ადამიანების გახარება თუ გსურთ, ნეონ გალერის აუცილებლად უნდა ესტუმროთ. და თუ ახალი საქმის წამოწყებაა თქვენი ამჟამინდელი მიზანი, მაშინ სალომესა და ნინუცას რჩევები ძალიან გამოგადგებათ!
