| ანნა მათიაშვილი |
Salone Del Mobile - მილანის დიზაინის კვირეულის მთავარი ღონისძიება და ყველაზე პრესტიჟული ავეჯის შოუ წელს უკვე 62-ედ იმართება. გამოფენის პრეზიდენტი მარია პორო შოუზე დაახლოებით 2000 მონაწილესა და 300 ვიზიტორს ელოდება მთელი მსოფლიოდან. დეკორით, ავეჯითა და ინსტალაციებით სავსე Fiera Milano-ს დარბაზების დათვალიერება ნამდვილად გასაოცარი გამოცდილება იქნება.
წლევანდელ გამოფენაზე აღსანიშნავია, რომ ორგანიზატორები არქიტექტორებისა და ნეირომეცნიერების თანამშრომლობით ადამიანზე ორიენტირებულ მარშრუტებს წარმოადგენენ. Salone del Mobile პირველი სავაჭრო გამოფენა გახდება, რომელიც ნეირომეცნიერებას ვიზიტორთა გამოცდილების გასაუმჯობესებლად და დათვალიერების პროცესის გასამარტივებლად გამოიყენებს, ამისთვის კი ოპტიმიზებულ ბილიკებს შექმნის.
გამოფენაზე სტუმრებს ამერიკელი კინორეჟისორის დევიდ ლინჩის ინსტალაცია “A Thinking Room” დახვდებათ.
მათთვის, ვისაც სურს, რაც შეიძლება მეტი ახალი მწარმოებლისა და პროდუქტის, ინტერიერის დიზაინის ტენდენციების გაცნობა, ავეჯის გამოფენა შესანიშნავი ადგილია. 16 დარბაზში სახლის ყველა ოთახის შესაბამისი სექცია დაგხვდებათ, მათ შორის სამზარეულოს კუთხე, რომელსაც წელს EuroCucina უმასპინძლებს. ბრენდი Lombardini22-თან თანამშრომლობით კეთილდღეობასა და მდგრადობაზე ორიენტირებულ სამზარეულოსა და აბაზანის დიზაინებს წარადგენს. EuroCucina სამზარეულოს ინტერიერის მიმდინარე ტენდენციებზე მოუყვება ვიზიტორებს და ამასთან ერთად ღონისძიებას გამართავს, რომელიც სამზარეულოს ინოვაციურ ტექნოლოგიებსა და მოწყობილობებს გააცნობს სტუმრებს.
Salone del Mobile-ზე არაერთ ახალგაზრდა დიზაინერს ექნება საკუთარი პროდუქციის წარდგენის შესაძლებლობა, ამ ყველაფერს კი SaloneSatellite-ს სექცია უზრუნველყოფს. აღსანიშნავია, რომ SaloneSatellite-ის პლატფორმა უკვე 25 წელია ერთგულად ასრულებს მთავარ მიზანს, რაც დამწყები დიზაინერების მხარდაჭერაა.
გამოფენა კულტურულ პროგრამასაც მოიცავს. სწორედ ამ პროგრამის ნაწილია დევიდ ლინჩის ინსტალაცია “სააზროვნო ოთახი”. როგორც რეჟისორი ამბობს, მისი მიზანი ვიზიტორებში ინტერიერის წარმოებასა და მის კონცეფციებზე ფიქრის პროვოცირებაა. როგორც დევიდ ლინჩის მეგობარი და პროექტის კურატორი, ანტონია მონდა, ამბობს, რეჟისორს ავეჯის შექმნა უყვარს და ინსტალაციაც მისივე ხელებითაა დამზადებული.
გარდა ამისა, ემილიანო პონცი, Acurat და Design group Italia გვთავაზობს ინსტალაციას სახელწოდებით “Under the Surface”, რომელიც აბაზანის სივრცის ცენტრალური ნამუშევარია. ინსტალაცია ჩაძირულ კუნძულს ასახავს, რომელიც ვიზიტორებს თანამედროვეობის ერთ-ერთ მთავარ გამოწვევაზე - გლობალურ დათბობაზე დააფიქრებას აიძულებს. ინტერაქციული ნამუშევარი ადამიანსა და დედამიწის ყველაზე ძვირფას და მნიშვნელოვან ბუნებრივ რესურსს შორის არსებულ ურთიერთობას წარმოაჩენს.
ავეჯის გამოფენაზე არაერთი წარმატებული დიზაინერი გამოვა სიტყვით, მათ შორის იქნებიან პრიცკერის პრემიის მფლობელი ფრენსის კერე, ჯინ განგი და ჯონ პოსონი. დისკუსიებში ისეთ საკითხებს განიხილავენ, როგორიცაა, მაგალითად, ხელოვნური ინტელექტის გამოყენება ინტერიერის დიზაინში.
16-დან 21 აპრილამდე Salone del Mobile Rho Fiera Milano-ს სივრცეს დაიკავებს და ინტერიერის დიზაინის ინოვაციებს, სიახლეებსა და ტენდენციებს ყველა დაინტერესებულ პირს გააცნობს. გამოფენა მნიშვნელოვანია არა მხოლოდ ინტერიერის დიზაინის ენთუზიასტებისთვის, არამედ დიდ როლს თამაშობს ნაკლებად ცნობილი დამწყები დიზაინერების მხარდაჭერაში.
შეგიმჩნევიათ, ფალიაშვილის 17 ნომერში, სიმწვანეში ჩარგული პატარა სალონი? Nail Bar #1 მალე 10 წლის გახდება, ის პირველი სპეციალიზებული ფრჩხილების სალონია საქართველოში. დღეს კი The Diary-ის რედაქცია სალონის შიდა სამზარეულოში შეგიძღვებათ.
მოდის იტალიურმა ქალაქმა დიზაინის წლის მთავარ ღონისძიებას უმასპინძლა. Salone del Mobile როგორც წინა სტატიაში გითხარით, წელს 62-ე გამოშვებით დაგვიბრუნდა. გამოფენის პავილიონები სავსე იყო როგორც დებიუტანტთა ნამუშევრებით, ისე ცნობილი მოდის სახლების დიზაინებით, როგორიცაა პრადა, გუჩი, ბოტეგა ვენეტა, ლუი ვიტონი და სხვა.
უკვე ორ საუკუნეზე მეტია რაც ჩვენს დაუძინებელ მტერს, რუსეთს ვებრძვით. 1801 წლიდან ქართული სამეფო-სამთავროების ნელ-ნელა გაუქმების პროცესი იწყება. მოდით, ერთად გადავავლოთ იმ აჯანყებებისა და პროტესტების ფოტოებს, რომლებიც შემორჩა ისტორიას და დღესაც გვახსენებენ თუ როგორი მომავლისთვის ღირს ბრძოლა.
