ვალენტინობა: იდეალური დრო რომანტიკული კინომარათონისთვის

ვალენტინობის დღე იდეალური დროა, რომ ყოველდღიურობის აურზაურისგან ცოტა ხნით გავთავისუფლდეთ და საყვარელ ადამიანთან ერთად დრო სასიამოვნოდ გავატაროთ. ზოგისთვის ეს დღე ყვავილებსა და რომანტიკულ ვახშამს ნიშნავს, ზოგისთვის – მშვიდ გარემოში ფილმის ყურებას. თუ თქვენც იმ წყვილებს შორის ხართ, ვინც ვალენტინობის გატარებას ემოციური კინომარათონით გეგმავს, ეს სია სწორედ თქვენთვისაა. ჩვენ შევარჩიეთ ფილმები – რომანტიკული კლასიკიდან თანამედროვე სიყვარულის ისტორიებამდე, რომლებიც თქვენს საღამოს კიდევ უფრო განსაკუთრებულს გახდის.

რომაული არდადეგები

ოდრი ჰეპბერნისა და გრეგორი პეკის ქიმია საოცრად ნაზ და კლასიკურ სიყვარულის ისტორიას ქმნის. რომის ქუჩებში მოგზაურობა სიუჟეტს დამატებით ჯადოსნურობას სძენს. თუ კინოს კლასიკა და რომანტიკული თავგადასავლები გიყვართ, ეს ფილმი ნამდვილად მოგხიბლავთ.

უბის წიგნაკი

ეს კინოშედევრი ნამდვილი სიყვარულის ისტორიაა, რომელსაც დრო ვერ აფერმკრთალებს – პირიქით, კიდევ უფრო ამძაფრებს. არ გაგიკვირდეთ, თუ ფილმის ყურებისას ცრემლები მოგაწვებათ. „უბის წიგნაკი“ ერთ-ერთი ყველაზე ემოციური ფილმია თავის ჟანრში და დაუვიწყარ გამოცდილებას გპირდებათ, რომელიც გაჩვენებთ, რას ნიშნავს ჭეშმარიტი სიყვარული.

მზის ამოსვლამდე

ეს გახლავთ 1995 წლის ამერიკული რომანტიკული ფილმი, რომელიც ტრილოგიის პირველი ნაწილია. შემთხვევითი შეხვედრის შემდეგ ორ ადამიანს შორის სიყვარულის მაგია მოულოდნელად ღვივდება და ერთ დღეში კინო ინდუსტრიაში შეუცვლელი და საკულტო რომანტიკული ისტორია იწერება. ტრილოგიის დანარჩენ ნაწილებში კი შეგიძლიათ ნახოთ როგორ გრძელდება მატარებელში დაწყებული სიყვარულის ამბავი.

ამელი

„ამელი“ ფრანგული რომანტიკული კომედიაა, რომელიც სიყვარულის ქვეყნის უნიკალურ ატმოსფეროს გადმოსცემს. ფილმის ყველა დეტალი სავსეა განსაკუთრებული და განსხვავებული ემოციებით. ამელის სიყვარულის ძიების გზას უჩვეულო ხიბლი აქვს, ხოლო მისი ბედნიერების შეგრძნება გულგრილს არავის დატოვებს. ეს ფილმი განსხვავებული, მაგრამ ემოციურად ღრმა არჩევანია ვალენტინობისთვის.

ლა-ლა ლენდი

და ბოლოს, „ლა ლა ლენდი“ – მუსიკა, ვნება და სიყვარული, ყველაფერი, რაც ამ დღეს სრულყოფილად შეეფერება. თუ გსურთ, ვალენტინობას ოდნავ მელანქოლიური რომანტიკის ელფერი შესძინოთ, მაშინ დრო არ დაკარგოთ და აირჩიეთ ეს დაუვიწყარი ფილმი.

სიყვარულს უამრავი გამოხატულება აქვს, მაგრამ მთავარი ისაა, რომ ერთმანეთისთვის დრო გამონახოთ – თუნდაც ეს დრო უბრალო ფილმის ყურებას დაეთმოს. ჟანრს მნიშვნელობა არ აქვს, მთავარია ის ემოციები, რომლებიც ამ მომენტს დაუკავშირდება. ასე რომ, მოიმარაგეთ პოპკორნი, მოეხვიეთ საყვარელ ადამიანს და ისიამოვნეთ კინომარათონით. ბოლოს და ბოლოს, ვალენტინობა იდეალური დროა იმისთვის, რომ კიდევ ერთხელ აგრძნობინოთ ერთმანეთს, რატომ ხართ ერთად.