თიკა და გიორგი THE DIARY ORIGINALS-ის რუბრიკაში

| ანა ციხელაშვილი |

სოციალური ქსელების მზარდ პოპულარობასთან ერთად, კონტენტკრეატორების რაოდენობაც იზრდება, თუმცა მათგან მხოლოდ ცოტას შეუძლია ხალხის ნდობა და სიყვარული მოიპოვოს. სწორედ ავთენტურობა და კრეატიულობა გამოარჩევს თიკა კურტანიძეს და გიორგი ნაჭყებიას, რომლებიც TikTok-სა და Instagram-ზე ათასობით ადამიანს აერთიანებენ. თიკა და გიორგი არა მხოლოდ ცხოვრების გზაზე, არამედ საქმიანობაშიც იდეალური პარტნიორები არიან. მათი კონტენტი საინტერესო და მრავალფეროვანი თემატიკით გამოირჩევა. თიკა თავის მოვლისა თუ მაკიაჟის შესახებ რჩევებითაა ცნობილი. ხოლო გიორგი ტექნოლოგიების სამყაროში საუკეთესო სიახლეებს გვაცნობს და სპორტის ვარსკვლავებთან ინტერვიუებით გვანებივრებს.

დღეს ისინი ჩვენი რუბრიკის The Diary Originals-ის სტუმრები არიან და მოგვიყვებიან, თუ როგორ აღმოჩნდნენ სოციალურ ქსელში, სადაც ხალხის სიყვარულთან ერთად ერთმანეთიც შეიძინეს.

სოციალურ ქსელებში გამოჩენამდე რა პროფესიაში მოღვაწეობდით?

გიორგი: სამართალმცოდნე ვარ, ვმუშაობდი შესყიდვებში და ვიყავი იურისტი.

თიკა: მე გამოყენებით ბიომეცნიერებასა და ბიოტექნოლოგიაში მაქვს ბაკალავრის ხარისხი, მომსახურების სფეროშიც მიმუშავია და სამედიცინო წარმომადგენელიც ვყოფილვარ. თუმცა ჩემი ჰობი მუდმივად იყო სოციალური ქსელები და ჩემს ძმასთან ერთად იუტუბზე ვიდეოების დადება დავიწყე, მაშინ ჯერ მხოლოდ 14 წლის ვიყავი. დღემდე მაქვს არხი, 30 000-ამდე გამომწერი მყავს.

როდის მიხვდით რომ კონტენტის შექმნა იყო თქვენი საყვარელი საქმიანობა?

გიორგი: თიკა 14 წლიდან იუტუბერი იყო. მე კი, ერთხელ გართობის მიზნით გადავიღე ვიდეო, რომელმაც 400 000 ნახვა დააგროვა და ვიფიქრე, რატომაც არა-მეთქი და დავიწყე კონტენტ კრეატორობა.

თიკა: ტიკ-ტოკზე აქტიურობა კოვიდის დროს დავიწყე. თავიდან არ მეგონა, რომ პროფესიად ჩამოყალიბდებოდა, უბრალოდ იყო ჰობი და დროის გასაყვანი საშუალება. ნელ-ნელა ჰობი პროფესიად გადაიქცა.

@tikakurtanidze გილოცავთ 2025 წელს 🥳🌟 #მაკიაჟი #სეფორა ♬ original sound - Tika Kurtanidze

ამ წლების განმავლობაში, როგორ შეიცვალა სოციალური ქსელები და მათი მეშვეობით სამყარო?

თიკა: პირველ რიგში, ვიტყოდი, რომ შეიცვალა კონკურენცია. მაშინ არ იყო ამდენი კონტნენტ კრეატორი, პროფესია არ იყო ეს სფერო. შემოსავლის წყაროც მხოლოდ მონეტიზაცია იყო, ისიც საკმაოდ დაბალი. დღეს მეტი შესაძლებლობაა, მაგალითად ბრენდებთან და კომპანიებთან თანამშრომლობა. მეორე მხრივ, განსხვავდებოდა ფორმატი. მაშინ უფრო გრძელი ვიდეოები, ბლოგები იდებოდა. ტიკ-ტოკის 30 წამიანი ვიდეოების შემდეგ, საზოგადოება მიეჩვია მოკლე ვიდეოებს, ყურადღების და კონცენტრაციის დონემ ძალიან დაიკლო.

როგორ განსხვავდება სოციალური პლატფორმები ერთმანეთისგან?

თიკა: ტიკ-ტოკზე ძალიან ბევრ, სხვადასხვა თემატიკის ვიდეოს უყურებ, იუტუბზე კი, როდესაც შედიხარ, ინტუიციურად არ გიწევს რაღაცების ყურება, თავიდანვე იცი რისი ნახვა გინდა, ტიკ-ტოკზე ვერც გამოიცნობ შემდეგი ვიდეო რაზე იქნება. დღევანდელ დღეს ყველაფერი ალგორითმის დონეზეა დაყვანილი - მნიშვნელოვანია რას შეინახავ, ვის გადაუგზავნი, რამდენი ხანი გაჩერდები ერთ ვიდეოზე, რას დაალაიქებ - ეს ყველაფერი გადადის მათემატიკურ რიცხვებში და მაგის მიხედვით მუშაობს პლატფორმაც. ინსტაგრამის დასახასიათებლად ალბათ ერთი სიტყვაც საკმარისია - “ესთეტიკა”. ტიკ-ტოკზე უფრო ჩართულობა და საუბრებია მნიშვნელოვანი.

@mandrein რომელია ყველაზე კარგი? 😅😅 @Tika Kurtanidze ♬ original sound - ManDREIN • მანდრეინი

როგორ არჩევთ ბრენდებს, რომლებთანაც თანამშრომლობა გსურთ?

თიკა: პირველ რიგში აუცილებელია, რომ მე თვითონ მომწონდეს პროდუქტი და თავად დავტესტო ისინი. ბიოტექნოლოგიის ფესვებს არ ვივიწყებ და შემადგენლობას ვამოწმებ, არის რაღაც ინგრედიენტი, მაგალითად კანცეროგენი, რომელიც საზიანოა და მის შემცველ პროდუქციას ვერასდროს გავუწევ რეკომენდაციას. მორალური მხარეც არის, მეც და გიორგიც თავს ვიკავებთ ჯანმრთელობისთვის საზიანო პროდუქციის რეკლამისგან.

გიორგი: მე როდესაც ტექნიკის პროდუქციის რეკლამის შემოთავაზება მაქვს, ვიწყებ კვლევას, ვამოწმებ რა აქვს კარგი, რა ცუდი. მთავარია ობიექტური ვიყო. საერთოდ, ვფიქრობ, რომ საზოგადოებას არაფრისკენ უნდა მოუწოდო, პროდუქცია უბრალოდ უნდა შეაფასო და თუ მოეწონებათ, თავად შეიძენენ.

როგორია თქვენი ერთი დღის რუტინა კონტენტზე მუშაობისას?

თიკა: ყველას ძალიან მარტივი გონია, არადა წუთნახევრიან ვიდეოსაც დიდი შრომა სჭირდება. ყველაფერი იწყება იდეით, შემდეგ ქოფის ვწერთ, სცენარი იხვეწება, მერე მოდის გადაღება, მონტაჟი - ბევრი ეტაპია. ფაქტობრივად ვართ რეჟისორი, პროდიუსერი, ოპერატორი. როდესაც გიორგი და მე ერთად ვმუშაობთ, შეგვიძლია რაღაცები გადავინაწილოთ.

საქმიანობასა და პიროვნულ ზრდაში რამდენად ეხმარებით ერთმანეთს?

გიორგი: სანამ თიკას გავიცნობდი, ჩემი ვიდეოების ხარისხი არც ისე კარგი იყო. ჩემს კონტენტს კარგად ეტყობა, რომ თიკასთან ურთიერთობის შემდეგ ხარისხი იმატებს და იმატებს.

თიკა: ამ ურთიერთობის შემდეგ პიროვნულად და კარიერულად ძალიან გავიზარდეთ. თავიდან თავის მოვლის კონტენტი არ მქონდა, გიორგი სულ მეუბნებოდა, რომ ჩემი ცოდნის გამოყენება შემეძლო ამ საქმიანობაში. გიორგიმ სწორი მიმართულება მომცა და დღეს უკვე ძირითადად მაკიაჟისა და თავის მოვლის შესახებ მაქვს კონტენტი.

კონტენტზე რახან ვსაუბრობთ, თქვენი აზრით რამდენად მნიშვნელოვანია გქონდეს ნიშა, რომელსაც მიყვები შენს სოციალურ გვერდზე?

გიორგი: ვფიქრობ, დასაწყისში სასურველია რომ ნიშა გქონდეს. იმით უნდა დაიწყო რაც იცი, რაც გაინტერესებს და რისი კეთებაც გიყვარს. მე თუ მიყვარს სპორტი და ტექნიკა, ბუნებრივია, რომ მათზე მთელი სულით და გულით ვლაპარაკობ.

თიკა: იმას დავამატებდი, რომ როდესაც როგორც პიროვნება, ხდები ცნობადი, შენგან უკვე ბევრი რამაა საინტერესო.

მე ასეთი დევიზი მაქვს - რომ ყველაფერი კონტენტია.

ყოფილა შემთხვევა, რომ იმ ვიდეოს, რომელიც მეგონა არავის დააინტერესებდა, ძალიან დიდი გამოხმაურება ჰქონდა. მაგრამ საწყის ეტაპზე კარგია ერთ ნიშაზე დახვიდე, როდესაც რაღაც კონკრეტული შენ გიკავშირდება, უკვე ასოციაციას ქმნი ადამიანებში.

წარმოიდგინეთ რომ ერთი დღე უნდა გაცვალოთ თქვენი ტიკ-ტოკ გვერდები, როგორ ვიდეოებს გადაიღებდით?

გიორგი: ტრენდს - “გაემზადე ჩემთან ერთად” გადავიღებდი და თიკას ვიდეო თუ არის 3 წუთიანი, ჩემი იქნებოდა 20 წამი, უბრალოდ მაისურს ჩავიცვამდი.

@tikakurtanidze

გაემზადეთ ჩემთან ერთად 🇮🇹🤌

♬ original sound - Tika Kurtanidze

თიკა: მე ალბათ გადავიღებდი ისეთ ვიდეოს, რომელშიც გიორგის პიროვნული მხარე ჩანს. მაგალითად “ჩემი საყვარელი მოწყობილობები 2024 წელს”, ან “საყვარელი ადგილები სადაც მიმოგზაურია”.

რა მოგცათ ყველაზე ძვირფასი ამ საქმიანობამ?

თიკა: ერთმანეთი. ამ სფეროში რომ არ ვყოფილიყავით ალბათ ვერ გავიცნობდით ერთმანეთს. ამის შემდგომ ხალხის სითბო, ყურადღება და ნდობაა.

უარყოფით კომენტარებს როგორ უმკლავდებით?

თიკა: ნელ-ნელა ხვდები რომ პრობლემა შენში არ არის და ეს იმ ადამიანების პროექციაა შენზე. ცუდ კომენტარსაც ორ ნაწილად გავყოფდი: ერთია რომ მასში სიმართლის მარცვალია და შეიძლება გავითვალისწინო და მეორე ცარიელი ზიზღია.

მთავარია, რომ გვესმოდეს It’s not about you, it’s about them.

@mandrein საუკეთესო წელი ჩემს ცხოვრებაში ❤️ გისურვებთ ულევ ბედნიერებას, წარმატებას, ჯანმრთელობას და ყველაფერ საუკეთესოს! @Tika Kurtanidze ♬ suara asli - zakye_muh

დასასრულს, იმ ადამიანს რას ეტყოდით, ვინც ახლა იწყებს კონტენტის შექმნას?

თიკა: უნდა აკეთოს ის რაც უყვარს. ვიდეოს გადაღების დროს წარმოიდგინეთ, რომ თქვენს მეგობარს ესაუბრები. არ უნდა დაიძაბო და იყო ავთენტური, ყველა ადამიანი ხვდება ვიდეოს პირველივე ნახვაზე რამდენად ხელოვნურია ადამიანი, ყოველთვის იგრძნობა ეს.

გიორგი: ყოველდღე უნდა იმუშაო და განვითარდე, ყოველი შემდეგი ვიდეო უკეთესი უნდა იყოს.