KEBURIA და SKAZZ ლონდონის მოდის კვირეულზე

ქართველი დიზაინერი გიორგი ქებურია ლონდონის მოდის კვირეულზე დებიუტისთვის ემზადება. 23 თებერვალს, დილის 11 საათზე, ქებურია შემოდგომა/ზამთრის კოლექციას წარადგენს. ლონდონში მოდის კვირეული 20 თებერვალს დაიწყო და 24 თებერვლამდე გაგრძელდება.

KEBURIA სამოსისა და აქსესუარების ბრენდია, რომელიც თბილისში 2010 წლიდან იქმნება. ლონდონის მოდის კვირეულის აღწერაში ვკითხულობთ, რომ ქართველი დიზაინერის ხელწერა ფემინურობის თანამედროვე ინტერპრეტაციით გამოირჩევა და მოცულობით ფორმებს, მსუბუქი და მძიმე ქსოვილების სინთეზით შექმნილ დიზაინებსა და გამოყვანილი სილუეტების კლასიკურ ელეგანტურობას აერთიანებს.

ქებურია ერთ-ერთი პირველი დიზაინერია, რომელმაც საკუთარი ხედვით ადგილობრივ მოდის სცენაზე მნიშვნელოვანი ადგილის დამკვიდრება შეძლო. დიზაინერი საქართველოში გაიზარდა და კარიერა ქვეყნის რთულ სოციალურ და პოლიტიკურ გარემოში დაიწყო, რამაც კოლექციების შინაარსობრივ მხარეზეც იმოქმედა. ქებურიას ნამუშევრები რეფლექსიაა ისეთ თემებზე, როგორიცაა ჰომოფობია და 90-იანი წლების სამოქალაქო ომის მემკვიდრეობა.

ქებურიას კოლექციები მამაკაცურ დეტალებსა და ფემინურ ელეგანტურობას აერთიანებს. მოცულობითი ფორმებისა და მინიმალისტური დიზაინის საშუალებით, ბრენდი ტანსაცმელს მოდის ესკაპიზმის ელფერს ანიჭებს, ვიდრე მხოლოდ ფუნქციურ დანიშნულებას.

ქებურიას უნიკალურმა დიზაინმა საერთაშორისო აღიარებაც მოიპოვა. მისი კოლექციები მოდის ისეთი გავლენიანი გამოცემების გვერდებზე გამოჩენილა, როგორიცაა Vogue, W Magazine, Harper’s Bazaar და i-D. გარდა ამისა, ქებურიას შექმნილი სათვალეები და სამოსი არაერთი ვარსკვლავის ლუქის ნაწილი გამხდარა, მათ შორის არიან რიანა, ლედი გაგა, როზალია, მაილი საირუსი და სხვები.

ლონდონის მოდის კვირეულზე ქებურიას ჩვენებას ქართული ბენდი Skazz გააფორმებს. ჯგუფი ქუთაისში, პანდემიის პერიოდში დაარსდა. Skazz-ის შემოქმედება ერთდროულად სიყვარულს, რომანტიკასა და სოციალურ თემებს ეხება.

Ph: Davit Tchalidze, Mari Vardosanidze.