14 წელი შინდისის გმირების ლეგენდად ქცეული თავგანწირვიდან

„ჩვენ ვართ კაცები, არ ვართ ლაჩრები, გულის კაცები და ვაჟკაცები,

ერთი ყუმბარა გვერდით თან გვიდევს, სიკვდილის შიში ვერ აგვატირებს…

ბევრი ვიყავით, ერთი სამარე თხილის გულივით გავინაწილეთ"

გარდაცვლილი შინდისელი მებრძოლის, 21 წლის მიხეილ დვალიშვილის ჯიბეში, ნაპოვნი დაფლეთილი ლექსი.

შინდისის მინდვრებში, გმირულად დაღუპული და ლეგენდად ქცეული ქართველი სამხედროების ხსოვნას უკვე მე-14 წელია, ტკივილნარევი სიამაყით მივაგებთ პატივს. გორის რაიონ სოფელ შინდისში მცხოვრებლებს საკუთარი გმირები ჰყავთ, ჯარისკაცები, რომელთა სახელებიც ოქროს ასოებით ჩაიწერა საქართველოს ისტორიაში და რომლებმაც გამორჩეული სიმამაცის, სიმტკიცისა და თავგანწირვის მაგალითი უჩვენეს სამყაროს.

შინდისის გმირების ლეგენდად ქცეული ამბავი 2008 წლის 11 აგვისტოს უკავშირდება, 14 წლის წინ, მსუბუქად შეიარაღებული 22 ქართველი ჯარისკაცი (სე­ნა­კის მე­ო­რე ბრი­გა­და) აგვისტოს ომის დროს, რუსულ ბატალიონთან (58-ე არ­მი­ის მო­ტომსრო­ლელ­თა ასე­ული) არათანაბარ ბრძოლაში ჩაება. შინ­დი­სე­ლე­ბის გად­მო­ცე­მით, შე­ტა­კე­ბამ­დე 2 სა­ა­თით ადრე რუ­სუ­ლი ტან­კე­ბი სო­ფელ­ში ქარ­თუ­ლი დრო­შე­ბით გა­მო­ჩე­ნი­ლან და შინ­დი­სის რკი­ნიგ­ზის სად­გურ­თან ჩა­საფ­რე­ბუ­ლან. სა­ვა­რა­უ­დოდ, იცოდ­ნენ, რომ იმ გზა­ზე ქარ­თვე­ლებს უნდა გა­ევ­ლოთ.

სე­ნა­კის ბა­ტა­ლი­ო­ნს მი­ახ­ლო­ე­ბის­თა­ნა­ვე აუ­ფეთ­ქე­ბია­ პირ­ვე­ლი და ბოლო მან­ქა­ნა და ამით გა­სას­ვლე­ლე­ბი ჩა­უ­კე­ტავს, 22-მა მებ­რძოლ­მა ასე­ულს გმირული წი­ნა­აღ­მდე­გო­ბა გა­უ­წია.

ბრძოლამ დაახლოებით ერთ საათს გასტანა, შინდისის მინდვრებზე 17 ქართველი ჯარისკაცი გმირულად დაეცა, მათი დიდი ნაწილი ბრძოლაში დაიღუპა, მეორე ნაწილმა კი ტყვედ ჩაბარებას - სიკვდილი თავადვე ამჯობინა. ტყვია-წამალის ამოწურვის შემდეგ ალექსანდრე ონიანმა გარშემო ცოცხლად გადარჩენილი ბიჭები შემოიკრიბა და ლოცვის შემდეგ თავი აიფეთქა. 22 შინდისელიდან სიკვდილს მხოლოდ 5 ჯარისკაცი გადაურჩა, მათგან ერთ-ერთს, შინდისის კიდევ ერთი გმირი მცხოვრები ბადრი ხუციშვილი მალავდა საკუთარ სახლში.

2008 წლის უთანასწორო ომის დროს არა ერთი გმირული ისტორიის მომსწრენი გავხდით, თუმცა შინდისის ბრძოლა ის გამორჩეული ეპიზოდია, რომელსაც ყოველ 11 აგვისტოს სათანადო პატივისცემით, მოწიწებითა და მადლიერებით უნდა მივაგებდეთ პატივს.

ალექსანდრე ონიანი, ემზარ წილოსანი, ვეფხვია ჯიშკარიანი, ზვიად კაცაძე, თეიმურაზ ბერიძე, ილია გაბუნია, ილია შეყლაშვილი, ირაკლი ჯანელიძე, კახა კოშაძე, ლევან მელქაძე, მარლენ ბარამია, მიხეილ დვალიშვილი, ნიკოლოზ ფორჩხიძე, რომან ზოიძე, რუსლან წულაძე, ფელიქს კაკაურიძე და შმაგი კუპატაძე - შინდისის გმირები.