ვენეციის კინოფესტივალი მსოფლიოს კინემატოგრაფიის ერთ-ერთი ყველაზე პრესტიჟული ღონისძიებაა. ის 1932 წელს დაფუძნდა და მას შემდეგ ახალი ფილმების ჩვენებისა და საერთაშორისო კინოს მნიშვნელოვანი პლატფორმაა. 2025 წელს, 82-ე ფესტივალზე, რეჟისორები და მსახიობები სხვადასხვა ჟანრის ნამუშევრებით წარდგნენ, ხოლო ჟიურის თავმჯდომარე ალეგზანდერ პეინია, ფილმების „The Holdovers“, „Election“ და „Sideways“ ავტორი.
წლის პროგრამაში განსაკუთრებული ყურადღება ექცევა იორგოს ლანტიმოსის „Bugonia“-ს, ნოა ბაუმბახის „Jay Kelly“-ს, ლუკა გუადანინიოს „After the Hunt“-ს, გილერმო დელ ტოროს „ფრანკენშტაინს“ და ბენი საფდის „The Smashing Machine“-ს. ასევე წარმოდგენილია პარკ ჩან-უკის, პაოლო სორენტინოსა და ვლადლენა სანდუს ახალი ნამუშევრები, რომლებიც ფესტივალის ერთ-ერთ მთავარ თემად იქცა.
იხილეთ TheDiary-ს მიმოხილვა 2025 წლის ვენეციის კინოფესტივალიდან:
After the Hunt
„After the Hunt“ იტალიელი რეჟისორი ლუკა გუადანინიოს ახალი დრამაა, რომლის სიუჟეტი უნივერსიტეტში განვითარებულ სექსუალურ ბრალდებებს ეხება. მთავარ როლში ჯულია რობერტსია, რომლის პერსონაჟიც პროფესორის კარიერასა და პირად ცხოვრებაში წარმოქმნილ კონფლიქტს აწყდება.
Jay Kelly
ჰოლივუდის შესახებ შექმნილი დრამა ფესტივალის ერთ-ერთ ყველაზე განხილვადი პრემიერაა. მთავარ როლში ჯორჯ კლუნია, რომელიც საკუთარ პროფესიასთან და პოპულარობასთან დაკავშირებულ წინააღმდეგობებს განასახიერებს. ფილმის ავტორი ნოა ბაუმბახია, რომლის ნამუშევრებიც „Marriage Story“ და „Frances Ha“ თანამედროვე ამერიკულ კინოში უკვე მნიშვნელოვანი ნიშნულია.
No Other Choice
კორეელი რეჟისორი პარკ ჩან ვუკი, რომლის ფილმებიც „Oldboy“, „The Handmaiden“ და „Decision to Leave“ საერთაშორისო აღიარებით სარგებლობს, ფესტივალზე ახალ ნამუშევარს წარადგენს. „No Other Choice“ არის მკვლელობის კომედია, რომელიც სიუჟეტში სარკასტულ და ირონიულ ელემენტებს იყენებს და კონკურსის პროგრამაში განსაკუთრებულ ინტერესს იწვევს.
At Work
ფრანგი რეჟისორი ვალერი დონზელი, რომელიც ცნობილია ფილმებით „Declaration of War“ და „Marguerite & Julien“, ვენეციის 82-ე კინოფესტივალზე ახალ ნამუშევარს წარადგენს. „At Work“ არის დრამა, რომელიც თანამედროვე გიგ-ეკონომიის პირობებში მცხოვრები მწერლის პირად და პროფესიულ ბრძოლას აღწერს.
La Grazia
ვენეციის 82-ე კინოფესტივალი პაოლო სორენტინოს ახალი ფილმით გაიხსნა. სიუჟეტის ცენტრში იტალიის პრეზიდენტია, რომლის როლსაც ტონი სერვილო ასრულებს. რეჟისორი აქ უჩვეულოდ მშვიდ და სადა ნარატივს გვთავაზობს, განსხვავებით მისი წინა, უფრო მასშტაბური ნამუშევრებისგან.
Cover-Up
ლორა პოიტრასის დოკუმენტური ფილმი პულიტცერის პრემიის მფლობელ ამერიკელ გამოძიებით ჟურნალისტსა და პოლიტიკურ მიმომხილველზე, საიმურ ჰერშზეა გადაღებული. ნამუშევარი მის პროფესიულ გზას ასახავს და განსაკუთრებით იმ ამბებს, რომლებმაც თანამედროვე ჟურნალისტიკის ისტორია შეცვალა. TheDiary-ს რედაქციისთვის ეს ფილმი განსაკუთრებულ ინტერესს იწვევს, რადგან ჟურნალისტიკის როლის მნიშვნელობაზე მნიშვნელოვან კვლევად მიგვაჩნია.
Bugonia
ბერძენი რეჟისორის, იორგოს ლანტიმოსის ახალ ფილმში მთავარ როლებს ემა სტოუნი და ჯესი პლემონსი ასრულებენ. „Bugonia“ მძაფრსიუჟეტიანი თრილერია, რომელიც გატაცების ისტორიას მოგვითხრობს და თანამედროვე საზოგადოების პრობლემებს ასახავს. ფილმს ვენეციის კინოფესტივალზე პრემიერის შემდეგ ექვს წუთიანი ოვაციებით შეხვდნენ.
Orphan
უნგრელი რეჟისორის, ლასლო ნემეშის ახალი ნამუშევარია, რომელიც ცნობილია ფილმით „Son of Saul“. „Orphan“ 1950-იანი წლების საბჭოთა ოკუპაციის პერიოდში ვითარდება და ბავშვობის რთულ გამოცდილებასა და ოჯახურ საიდუმლოებებს წარმოგვიდგენს.
Memory
უკრაინელი რეჟისორი ვლადლენა სანდუს ფილმი ვენეციის 82-ე კინოფესტივალზე წარმოდგენილი ერთ-ერთი ყველაზე პირადი ნამუშევარია. რეჟისორი ომის გამოცდილებას უბრუნდება და აჩვენებს, როგორ ინახავს მეხსიერება ტრავმას და როგორ გადადის ის ერთი თაობიდან მეორეზე.
წყალზე მოლივლივე ვენეცია კვლავ მსოფლიო კინოსა და მოდის ეპიცენტრად გადაიქცა. 82-ე საერთაშორისო კინოფესტივალი 27 აგვისტოს დაიწყო და 6 სექტემბრამდე გაგრძელდება. გაეცანით 2025 წლის ვენეციის კინოფესტივალის წითელი ხალიჩის ყველაზე გამორჩეულ ლუქებს.
პარიზი წლის ერთ-ერთ ყველაზე მნიშვნელოვან კულტურულ ღონისძიებას უმასპინძლებს. Grand Palais-ში, 30 სექტემბრიდან 10 ოქტომბრის ჩათვლით, გამოფენა „ვირჯილ აბლო: კოდები“ გაიმართება, რომელიც ჩვენი დროის ერთ-ერთი ყველაზე გავლენიანი შემოქმედის, ვირჯილ აბლოს ხსოვნას მიეძღვნება.
ყველაზე Gen Z და ფერადი ბენდი Mechanical Rainbow ქართველ პიანისტ გიორგი გიგაშვილთან ერთად მხიარულ და სიყვარულით სავსე კომპოზიციას MOMENDE გვთავაზობენ. „მომენდეს“ პრემიერა 12 აგვისტოს კინოთეატრ „ამირანში“ გაიმართა.
