ქართველი მულტიმედია არტისტი გვანცა უმა ჯაფარიძე, სასცენო სახელით .Gwatta., კარიერის ახალ ეტაპზე გადადის. მისი პირველი სოლო ალბომი Out Of Body ოფიციალურად 25 სექტემბერს CES Records-ის ლეიბლის ქვეშ გამოვა. ალბომის პრეზენტაცია თბილისის ექსპერიმენტულ თეატრ „ჰარაკში“ მუსიკალური პერფორმანსის სახით გაიმართა.
.Gwatta., რომელიც ცნობილია როგორც ჯგუფის „მწვანე ოთახი“ წევრი და სხვადასხვა პროექტის ავტორი, მსმენელს ღრმად პერსონალურ და ექსპერიმენტულ მუსიკას სთავაზობს. Out Of Body დრიმ-პოპს, ელექტრონულ როკს და ინოვაციურ საუნდ-დიზაინს აერთიანებს.
„თითოეული სიმღერა პიროვნულ განცდებსა და შინაგან კონფლიქტებს ასახავს, რომლებიც მარტოობის, შფოთვისა და ტრავმებთან გამკლავების რთულ, მაგრამ გარდამტეხ გზას აღწერენ“, – CES Records.
ალბომში შესულია რვა ორიგინალური კომპოზიცია და დასკვნითი ტრეკი „მთვარე და მზე“, რომელიც ორგვარი ინტერპრეტაციითაა წარმოდგენილი. თითოეული ნამუშევარი მუსიკად ქცეული მარტოობის, შფოთვისა და ტრავმის თემებს ეხება.
ალბომის ორი სინგლი მუსიკალურ პლატფორმებზე უკვე ხელმისაწვდომია. Phone Call-ის ვიდეო, რომელიც 25 მარტს გამოვიდა, ნიკა მაჩაიძემ (Nikakoi) გადაიღო. 1-ელ ივლისს კი .Gwatta.-მ წარადგინა „ნაცრისფერი“ – მისი პირველი ქართულენოვანი სიმღერა. ტექსტი და ვიდეო თავად არტისტის მიერ არის შექმნილი და მის სადებიუტო ვიზუალურ ნამუშევარს წარმოადგენს.
.Gwatta.-ს გზა Out Of Body-მდე მრავალფეროვან შემოქმედებით გამოცდილებას მოიცავს. თბილისის კონსერვატორიისა და ფინეთის სიბელიუსის აკადემიის კურსდამთავრებულმა წლები დაუთმო ჟანრების ექსპერიმენტულ კვლევას. ფინეთში ყოფნისას მან ფინელ კონტრაბასისტთან, ტუომას ტალვთან ერთად დუეტი შექმნა და 2023 წელს გამოსცა ალბომი Once in Suomi, რომელიც ჯაზსა და ორიგინალურ კომპოზიციებს აერთიანებდა. 2016 წელს კი, გვანცა უმა ჯაფარიძე 1990-იანი წლების ერთ-ერთი ყველაზე ცნობილი ჯგუფის „მწვანე ოთახი“ წევრი გახდა.
Out Of Body კი .Gwatta.-ს ყველაზე ამბიციური ნამუშევარი გახლავთ – ინტიმური, ექსპერიმენტული და ღრმად ადამიანური.
სრული ალბომი ხელმისაწვდომი 25 სექტემბრიდან, ყველა სტრიმინგ პლატფორმაზე იქნება.
მინისერიალი „სოხუმი“ 27 სექტემბერს კინოთეატრებსა და cavea.plus-ზე გამოვა. რეჟისორ გიორგი ბარაბაძის ნამუშევარი რეალურ მოვლენებზეა დაფუძნებული და სოხუმის დაცემის ბოლო დღეებს, 1990-იანი წლების პოლიტიკური დაპირისპირებებსა და გმირობის ისტორიებს ასახავს.
19 სექტემბერს, 17:00 საათზე, თბილისის მეათე საერთაშორისო ლიტერატურული ფესტივალი ოფიციალურად გაიხსნება და 23 სექტემბრამდე გასტანს.
2025 წლის ემის დაჯილდოება რეკორდებისა და დიდი გამარჯვებების საღამო იყო. მთავარი ჯილდოები სამი სერიალის შემოქმედებითმა ჯგუფმა წაიღო შინ. ოუენ კუპერი კი ყველაზე ახალგაზრდა ემის მფლობელი მსახიობი გახდა.
